GOE-Asime valora o anuncio de consulta para a 1ª poxa de eólica mariña

05 feb 2026 en Noticia de portada, Offshore,

O GOE-Asime afirma que o anuncio de consulta pública por parte do Goberno é unha boa nova, aínda que chegue con retraso.
“É un paso indispensable para avanzar no desenvolvemento da eólica mariña no noso territorio, unha enerxía clave para abaratar os custos enerxéticos da nosa industria e dos nosos cidadáns”.
Actualmente, en Galicia hai máis de 180 empresas que traballan xa para esta cadea de valor a nivel internacional, xerando 3.000 empregos directos e 2.000 indirectos. Con implantacións de parques no noso territorio poderían xerarase 5.000 novos postos de traballo e un efecto tractor noutras 200 empresas nos próximos 10 anos.

Valoración da consulta para a primeira poxa de eólica mariña

Enrique Mallón, Secretario Xeral do GOE-Asime, destacou que “esta consulta pública tería que ter chegado antes, pero agora mesmo estamos satisfeitos de que se produza porque é un paso non só suficiente, senón indispensable para poder avanzar na implantación de eólica mariña en Galicia”.

A nivel de emprego, dende o GOE-Asime insisten na enorme oportunidade que ten España, e Galicia en particular, no segmento da eólica mariña. “Actualmente hai en Galicia 3.000 persoas traballando directamente e 2.000 de forma indirecta en offshore wind, podendo xerar 5.000 novos empregos directos nos próximos 10 anos e xerar un efecto tractor en 200 empresas”.

Pero non só se trata de emprego, inciden dende Asime, senón do ecosistema de fabricación e construción de elementos para parques eólicos mariños que se creou especialmente no eixo Ferrolterra: “Actualmente en Galicia somos líderes a nivel mundial, con empresas tractoras como Navantia, Windar e Ocean Waves, pero tamén cunha cadea de valor moi especializada con empresas como Industrias Ferri, Acebron e moitas outras. Hai máis de 60 empresas galegas que teñen gran parte da súa facturación anual dedicada á eólica mariña e outras 120 que traballan puntualmente para ela. A eólica mariña é unha oportunidade para a nosa industria porque hoxe en día en Europa só hai capacidade para prover a un 50% de todos os parques eólicos mariños que se planea desenvolver a nosa industria está moi ben preparada. Tanto é así que, dos 5 únicos parques eólicos flotantes implantados en Europa, 3 teñen compoñentes e tecnoloxía galega”.

Se ben é certo que estas empresas galegas están actualmente a un 90% de capacidade produtiva ocupada, os potenciais parques eólicos mariños a implantar nas nosas costas tardarían como mínimo 6 anos en desenvolverse, polo que hai marxe para asumir eses novos traballos. De feito, a compoñente local é unha das grandes reivindicacións de Asime:

“Nas aportacións que traslademos á consulta pública do ministerio incidiremos especialmente na necesidade de ponderar con maior peso o compoñente local na valoración das poxas futuras que se saquen a concurso, para asegurar así un beneficio económico e social relevante para Galicia, onde se conta coas empresas da cadea de valor local para a construción deses parques mariños en augas galegas, que á súa vez paliarían os custos enerxéticos de industria e de cidadáns”.

Respecto aos seguintes pasos, o GOE-Asime espera que por fin se axilicen os trámites, tal e como solicitou a propia Unión Europea: “Poñer en marcha a primeira poxa é fundamental para empezar a conformar eses parques eólicos mariños en España, que, como ben dicimos sempre dende Asime, deben ser aqueles que se sexa razoables, compatibles con medio ambiente, co eido mariño e por suposto coa pesca, coa que non temos ningunha dúbida de que é posible a convivencia; así o demostran os 37GW de eólica mariña instalados xa no norte de Europa, con Reino Unido e Alemaña á cabeza. Aquí estamos a falar de implantar, entre 1 e 3GW de aquí a 2030 para toda España e 800 megavatios en Galicia, e de ocupar, como máximo, o 0.46% da superficie mariña de toda España”.

“Para nós a compatibilidade é innegable, agora é o momento de decidir onde e en que intensidade implantar eses parques nas nosas augas, e o faremos no marco do Observatorio da Eólica Mariña promovido pola Xunta de Galicia, onde estamos todos os actores implicados, pero dende logo Asime nunca vai promover decisións que prexudiquen a nosa comunidade, porque a clave desta implantación de eólica mariña reside precisamente no beneficio para a nosa cidadanía e a nosa industria, cun abaratamento dos custos enerxéticos e unha garantía de suministro que nos faga ter unha maior independencia enerxética, porque está claro que co convulso panorama internacional que temos, non aproveitar o noso recurso renovable sería un erro que non podemos permitirnos, porque vai en detrimento do benestar e do futuro da nosa propia sociedade”.

05.02.2026