Asime e Cobre San Rafael reúnen á industria galega para impulsar o desenvolvemento rural
- O espazo uniu a máis de 50 directivos de empresas e axentes de innovación da rexión nunha xornada de reflexión estratéxica sobre a industria local.
- Enrique Mallón, Secretario Xeral de Asime destacou a “necesidade de conectar o potencial das empresas galegas con proxectos tractores que xeren emprego e cadeas de valor locais”.
- Os participantes da mesa redonda coincidiron en que o rural galego pode ser un referente industrial e tecnolóxico mediante a modernización de infraestruturas, a colaboración horizontal e políticas públicas que impulsen a conectividade e a formación especializada.
O auditorio do Centro Sociocultural Luís Seoane de O Pino converteuse hoxe no punto de encontro da industria galega coa celebración da xornada «Desenvolvemento económico e social a través da industria», organizada pola Asociación de Industrias do Metal e Tecnoloxías Asociadas de Galicia (Asime) en colaboración con Cobre San Rafael.
O foro reuniu a máis de 50 directivos de empresas e axentes de innovación da rexión, así como a representantes institucionais nun espazo de reflexión estratéxica destinado a afianzar o crecemento competitivo da economía galega e abordar as claves da transformación industrial do rural galego.
O compromiso institucional coa reindustrialización responsable
A xornada comezou coas palabras de Enrique Mallón, Secretario Xeral de Asime, quen expresou que o sector industrial do metal e mineiro galego conta coa experiencia acumulada de décadas de actividade, con empresas consolidadas e con capacidade comprobada de innovación e crecemento. «O que temos que facer hoxe é conectar esa experiencia coas novas oportunidades que proxectos como o de Cobre San Rafael abren”, subliñou.
Pola súa banda, Manuel Taboada, Alcalde do Concello de O Pino, enfatizou que a construción desas alianzas é responsabilidade compartida. «Dende a administración local, o noso compromiso é apoiar as iniciativas que xeren emprego, fixen poboación no territorio e que brinden oportunidades de desenvolvemento profesional aos nosos veciños. Pero tamén pedimos responsabilidade ás empresas, compromiso coa comunidade e transparencia total nos procesos. O que buscamos aquí é construír algo que dure, que beneficie a xeracións futuras e que sirva como modelo para outras comarcas rurais«, destacou Taboada.
O Proxecto Cobre San Rafael: motor da reindustrialización e dunha cadea de valor local
Fernando Riopa, Director Xeral de Cobre San Rafael, presentou o proxecto Cobre San Rafael como “a oportunidade de construír un ecosistema empresarial integral arredor do cal se articularán pequenas e medianas empresas, servizos especializados e infraestruturas de apoio para toda a comarca”. O horizonte de 16 anos de operación sostida, segundo explicaba o portavoz, “crea certeza e previsibilidade para que as pequenas e medianas empresas locais poidan planificar investimentos en modernización, formación continua de persoal e diversificación do seu negocio sen temor á volatilidade dos mercados ou á incerteza xeral que caracteriza moitos sectores».
Riopa destacou un dato estratéxico que segundo o representante define o “cariz do proxecto»: “Máis do 65% dos suministros e servizos procederán de provedores galegos». Ademais, subliñou que segundo o Informe Valora, o 42% do gasto total en provedores realizarase especificamente no entorno local de Touro e O Pino, situando estes municipios como epicentro dunha nova cadea de valor industrial. «Hoxe xa colaboramos con 70 empresas do noso contorno, moitas delas presentes hoxe na sala, e esperamos que ese número siga crecendo«, engadiu Riopa.
Como referencia histórica, Riopa evocou o impacto transformador da industria en comarcas galegas. «As Pontes e Meirama, outrora territorios rurais con poboación dispersa e economía limitada, experimentaron un cambio radical grazas a proxectos mineiro-enerxéticos. Empresas como Acebrón, especializada en mecanizados e calderería, ou Perforaciones y Voladuras Blanco, antes coñecida como Blanco Casais, pasaron de pequenas estruturas familiares a xerar centos de empregos, diversificarse, modernizarse tecnoloxicamente e converterse en referentes do sector», recordou. «Este precedente demostra que a industria pode dinamizar economías rurais de forma profunda e sostible, xerando non só emprego directo, senón tamén diversificación empresarial, novas cadeas de valor e transformación social», concluíu.
Oportunidade económica: datos do Informe Valora
Durante a xornada tamén se puxo en valor o impacto económico global do proxecto, recollido no informe elaborado por Valora Consultores. Este estudo estima que:
“O impacto económico do proxecto ascende a 2.542,61 millóns de euros en Galicia durante todo o seu ciclo de vida. Durante a primeira fase, o impacto sobre o PIB xerado pola inversión inicial ascende a 165 millóns de euros anuais, o que representa un 0,26% do PIB de Galicia. Ademais, durante este período, xeraranse máis de 1.600 empregos equivalentes a tempo completo, representando un 0,15% do emprego galego”.
Estes datos foron citados por Fernando Riopa como exemplo do potencial tractor da actividade cando se desenvolve baixo estándares de responsabilidade, transparencia e integración territorial.
Capacidades e oportunidades para o desenvolvemento do rural
A mañá continuou cunha mesa redonda de alto nivel, moderada por Jennifer González, Directora de Relacións Institucionais de Asime, que reuniu a tres personalidades representativas do sector industrial galego: Víctor Nogueira, Director Xeral Comercial de Grupo Nogar; Carme Pampín, Co-Fundadora e Directora Executiva de Galchimia; e Diego Valiño, Presidente da Asociación de Empresarios de la Comarca de Arzúa.
Pola súa parte, Víctor Nogueira enfatizou que a loxística é o eixo vertebrador invisible que conecta ou desconecta as empresas rurais cos mercados internacionais. «En Galicia temos infraestruturas potentes: portos, ferrocarril e almacenamento. Pero requiren investimentos prioritarios en modernización e, máis importante aínda, coordinación entre todos os axentes», sinalou.
Así como Carme Pampín presentou o seu proxecto como proba de que a alta tecnoloxía pode desenvolverse fóra dos grandes núcleos urbanos. «Nós nacemos e crecemos en O Pino. O rural galego ofrece vantaxes reais para profesionais altamente cualificados: calidade de vida, comunidade real, posibilidade de impacto directo e proxectos con futuro. Moitos dos nosos colaboradores científicos viñeron de contextos urbanos europeos e hoxe non queren volta; a súa familia está aquí, a súa rede está aquí, o seu impacto é visible. «, explicou Pampín.
Diego Valiño abordou as barreiras que enfrontan os emprendedores rurais e propuxo solucións a través da colaboración. «A falta de escala, a dificultade de acceso a mercados e a competencia desigual son obstáculos reais. Pero teñen solucións a través da colaboración horizontal. Cando colaboramos, multiplicamos a nosa resiliencia. Precisamos políticas públicas orientadas ao desenvolvemento industrial estratéxico, formación especializada, infraestruturas de conectividade e, sobre todo, exemplos tanxibles como este que demostren que o futuro do rural é industrial, tecnolóxico e con emprego de calidade«, afirmou Valiño.
Unha chamada á unidade para o futuro industrial
Na clausura da xornada, Enrique Mallón subliñou que proxectos tractores como o de Cobre San Rafael, xunto coa traxectoria e capacidades das empresas galegas, permiten abrir un ciclo de crecemento competitivo no rural baseado na industria, na tecnoloxía e nunha cadea de valor sólida e profesionalizada.
Ademais, reivindicou un modelo industrial baseado en alianzas, estandarización, innovación e capacidade técnica, sinalando que “o rural galego ten talento e empresas capaces; o que precisaba era certezas e proxectos sólidos que actuasen de motor industrial”. Concluíu asegurando que Galicia “ten a oportunidade real de liderar un modelo industrial avanzado, competitivo e arraigado no territorio, sempre que o sector continúe traballando unido e orientado á excelencia”.
Asime e Cobre San Rafael reúnen á industria galega para impulsar o desenvolvemento rural
O espazo uniu a máis de 50 directivos de empresas e axentes de innovación da rexión nunha xornada de reflexión estratéxica sobre a industria local. Enrique Mallón,…